يا عـــــــــاشق الشعـــــــــــــــــــــر

يا عاشق الشعر شو الي بينك وبيني
الا بيوت عباد الله تناقلها

الشعر باحساسه يمثل مضاميني
والناس باحساسها انا امثلها

قدامي تكتب من الاشعار بيتيني
اتعب على قيمة الفكره واحللها

الشعر ماهو قصايد في الدواوين
الشعر افكار والمبدع يوصلها

وبعض القصايد قوافيها ما تغريني
لا اعجب بها ولا اعجب بقايلها

وبعض القصايد كانه عايشه فيني
القافية قبل لاتكمل اكملها

ان طولت كان شاعرها يسليني
وان اقصرت قلت ياليته مطولها

ترسم معاناتي الي عشت فسنيني
وتقول قصة حياتي لك من اولها

اربيت والمجد جينه الطابق الجيني
رحلته صعبه ولكني مواصلها

لو يكبر الحمل لي كتف يواسيني
كتف لي كبرت الحمله تحملها

تحت مظلة احاسيس المحبيني
من شمس جور الزمن نفسي اضللها

شوف كوكب الشرق نوره مال فيديني
وحقول عزمي نجاحاتي سنابلها

لا تشوفني قزم في عينك وانا عيني
تشوفني اكبر من الارض باكملها

ما كان متوقع من الالف عشريني
اني بوقف برجلي في محافلها

علم احبائي وعلم معاديني
ياوقت واهل الذهول النصر يذهلها

الي ما عنده كرامة ما يخاويني
ان كان ما بدل الخوة ببدلها

رفيقي الي اذا ضاقت يواسيني
الي اذا مالت الدنيا يعدلها

ما با رفيق اذا ضاقت يخليني
واهل الفعايل تمثلها فعايلها

ان قلت ياصاحبي وش بينك وبيني
بقول لك كلمة وحدة وحللها

اعلمك ليه ما اشكي ميلة سنيني
عليك والنفس بعدك صار مشغلها

اخاف بكره تميل الارض في عيني
وتكون انت الرفيق الي مميلها